Цзиньпин: БРИКС саммити ривожланаётган мамлакатлар ўртасидаги бирдамликни мустаҳкамлайди
Саммит 22-24 август кунлари Ёханнесбургда бўлиб ўтади.
БРИКСга аъзо давлатлар раҳбарларининг Жанубий Африкадаги учрашуви ассоциация тарихидаги муҳим босқич бўлиб, мамлакатлар ўртасидаги бирдамликни мустаҳкамлайди, деди ХХР раиси Си Цзиньпин. Сешанба куни у БРИКСнинг 15-саммити бўлиб ўтадиган Ёханнесбургга етиб келди.
“Ушбу саммит БРИКС механизмини ривожлантириш тарихидаги муҳим босқич бўлиб, ривожланаётган давлатлар ўртасидаги ҳамжиҳатлик ва ҳамкорликни янада юқори даражага кўтаришига ишонаман”, — деди сиёсатчи Хитой томонидан эълон қилинган баёнотда.
Цзиньпиннинг сўзларига кўра, у биргаликда ривожланиш ва сайёрамизда тинчликни мустаҳкамлаш йўлида Африка давлатларининг юқори ҳокимиятлари билан ҳамкорлик қилишга тайёр. Хитой раҳбарининг фикрича, БРИКС глобал иқтисодий тараққиётга ҳисса қўшади.
"Ассоциация аъзолари глобал бошқарувни оптималлаштирган ва халқаро муносабатларни демократлаштиришга ҳисса қўшган конструктив кучга айланди", — деди у.
Маълумот ўрнида, БРИКС саммити 22-24 август кунлари Ёханнесбургда бўлиб ўтади. Унда Хитой, Ҳиндистон, Бразилия ва Жанубий Африка давлатлари раҳбарлари, шунингдек, Россиядан ташқи ишлар вазири Сергей Лавров қатнашади. Россия Президенти Владимир Путин саммитда видеоконференция орқали иштирок этади.
