«Заправка»ларда юзага келаётган навбатлар ҳақида маълумот берилди
Ижтимоий тармоқларда метан «заправка»ларда узундан-узун навбатларнинг юзага келиши бир қатор «заправка»ларнинг ёпилишига сабаб бўлаётгани ҳақида хабарлар тарқалди.
Ижтимоий тармоқларда метан «заправка»ларда навбатнинг узайиб бораётгани, бунга бир қатор метан «заправка»ларнинг ёпиқлиги сабаб бўлаётгани, мазкур вазият метан нархининг ошишидан дарак бўлиши мумкинлиги ҳақида турли хабарлар тарқалди. Ҳолат юзасидан Энергетика вазирлиги маълумот берди.
Маълум қилинишича, республикадаги барча метан «заправка»ларга август ойи учун уларнинг талабларига асосан белгиланган лимитга кўра, табиий газ тўлиқ етказиб берилган. Ҳеч қандай чеклов киритилмаган.
«Қайсидир метан ’заправкаʼ ўз фаолиятини вақтинча тўхтатиб турган бўлса, демак, бу қандайдир техник сабаблар ёки бошқа бир омил туфайли бўлиши мумкин. Шунингдек, аввал таъкидлаганимиздек, метан ’заправкаъларда сотиладиган бир куб газ учун белгиланган нарх ошгани йўқ», — дейилади хабарда.
Вазирликнинг эслатишича, аҳоли ва бошқа тоифадаги истеъмолчилар қонунчиликда ўрнатилган тартибда белгиланган муддатларда табиий газ нархининг оширилиши ҳақида аввалдан огоҳлантирилади.
