Пригожин Путиннинг ота-онаси қабри жойлашган қабристонга дафн қилиниши мумкин

Путиннинг ота-онасининг қабри жойлашган Санкт-Петербургдаги Серафимовский қабристонига металл детекторлар ўрнатилди. Бу Пригожиннинг дафн маросимига тайёргарлик сифатида қаралмоқда.

«Фонтанка»нинг ёзишича, Санкт-Петербургдаги Серафимовский қабристонининг марказий дарвозаси олдида металл детектор рамкалари ўрнатилди. Хабарда келтирилишича, бунга авиаҳалокатда ҳалок бўлган Евгений Пригожиннинг дафн маросимига тайёргарлик кўрилгани сабаб бўлиши мумкин. Нашрнинг таъкидлашича, бизнес-жет йўловчиларидан қайси бири Серафимовский қабристонига дафн этилиши ҳозирча аниқ эмас, лекин у камида беш киши бўлишини таъкидламоқда. 

Қабристон директори ҳам металл детекторларнинг ўрнатилишини Пригожин ёки самолётнинг бошқа йўловчилари дафн этилиши билан боғлиқлигини билмаслигини айтган.

«Президент матбуот котиби Дмитрий Песков ҳам билмайди. Сиз эса мендан сўраяпсиз», —деди у.

Ҳозирда Пригожин қаерда ва қачон дафн этилиши ҳақида расмий маълумот йўқ. Бироқ, «Фонтанка»нинг таъкидлашича, 28 август ҳолатига кўра бизнесменнинг ўзи, шунингдек, «Вагнер» қўмондони Дмитрий Уткин ва Пригожин тузилмаларининг топ менежери Валерий Чекалов Санкт-Петербургда дафн этилиши аниқ. 

Маълумот учун, Серафимовский қабристонида Мудофаа вазирлигининг кўплаб фахрий аскарлари ва офицерлари, шунингдек, Россия президенти Владимир Путиннинг ота-оналарининг қабрлари жойлашган.

Маълумот учун, 23 август куни «Вагнер» раҳбари Евгений Пригожиннинг хусусий самолёти Твер областида ҳалокатга учради. Натижада бортда бўлган 10 кишининг барчаси ҳалок бўлган. Росавиация бортдагилар рўйхатида «Вагнер» асосчиси Евгений Пригожин, унинг командири Дмитрий Уткин, яна беш нафар вагнерчи ҳамда экипажнинг уч аъзоси келтирилганини маълум қилган. Россия тергов қўмитаси эса 27 август кунига келиб ҳалокат жойида топилган 10 кишининг қолдиқлари парвоз рўйхатида кўрсатилган одамларга тўғри келишини маълум қилди.