Талабаликка тавсия этилган абитуриентларнинг 50 фоиздан зиёди эркаклар
Тест синовида тўплаган балларига эътибор қаратилса, аёллар эркакларга нисбатан юқорироқ балл тўплаган.
Билим ва малакаларни баҳолаш агентлиги маълумотларига кўра, жорий йилда олий таълим муассасаларининг бакалавриат таълим йўналишларига ўқишга кириш учун 948 491 нафар абитуриент онлайн рўйхатдан ўтди. Бунда:
-
- эркаклар — 419 327 нафар (44,2 фоиз) ни;
- аёллар — 529 164 нафар (55,8 фоиз) ни ташкил этди.
Тест синови натижаларига кўра, 193 421 нафар абитуриент талабаликка тавсия этилган бўлиб, уларнинг:
-
- 100 491 нафари (52 фоиз) — эркаклар;
- 92 930 нафари (48 фоиз) — аёллар ҳиссасига тўғри келади.
Абитуриентларнинг тест синовида тўплаган балларига эътибор қаратилса, аёллар эркакларга нисбатан юқорироқ балл тўплаган ҳолда талабаликка тавсия этилган. Талабаликка тавсия этилган абитуриентларнинг ўртача ўтиш бали давлат гранти асосида:
-
- эркакларда — 112,4 баллни;
- аёлларда — 125,1 баллни.
Тўлов-контракт асосида:
-
- эркакларда — 88,9 баллни;
- аёлларда — 98,5 баллни ташкил этган.
«Эркаклар ва аёлларда ўртача ўтиш балларининг бундай фарқ қилиши улар рўйхатдан ўтишда танлаган таълим йўналишлари ва улардаги ўтиш баллари билан боғлиқ», — дейилади хабарда.
Таълим соҳалари бўйича фоиз ҳисобида олинганда «Ижтимоий таъминот» (91,7 фоиз), «Тиллар» (88,5 фоиз) ва «Таълим» (78,7 фоиз) соҳаларига аёллар, «Транспорт хизматлари» (93,5 фоиз), «Архитектура ва қурилиш» (84,8 фоиз) ва «Ахборот-коммуникация технологиялари» (75,3 фоиз) соҳаларига эркаклар кўпроқ талабаликка тавсия этилган.
