Ғазога ёрдам олиб келган юк машиналари Рафаҳ постида текширилмоқда

 

Мисрдан Ғазога борадиган Рафаҳ чегара пунктида фаластинликлар учун ёрдам олиб кетаётган юк машиналари текширувдан ўтишда давом этмоқда.

 

Текшириш вақт талаб этади ва вазият анча таранг.

 

Исроил танки юк машиналари текширилаётган пайтда Рафаҳ яқинида жойлашган Миср чегараси минорасини тасодифан ўққа тутди.

 

Таъкидланишича, фаластинликлар учун ёрдамнинг биринчи партияси жуда кичик ва Ғазо секторининг оғир шароитларга дуч келган икки миллиондан ортиқ аҳолисига ёрдам бера олмайди.

 

AFP хабарига кўра, якшанба куни Рафаҳ чегара пунктига 19 га яқин юк машинаси, шанба куни эса инсонпарварлик ёрдами олиб кетаётган 20 та машина Ғазога кириб келган.

 

Шу билан бирга, БМТ маълумотларига кўра, Ғазо аҳолисини қўллаб-қувватлаш учун кунига камида 100 юк машинасида ёрдам керак.

 

21 октябрь куни Миср-Ғазо чегарасидаги Рафаҳ ўтиш жойи очилиб, Исроил қамалидаги Ғазо секторига 20 та юк машинасида ёрдам кириб келди. Гуманитар ёрдам таркибида зарур бўлган дори-дармон ва озиқ-овқат маҳсулотлари бор. Экспертлар бу ёрдам жуда озлигини ҳамда ҳудуд учун ёқилғи ҳам зарурлигини айтмоқда.

 

Очиқ осмон остида қамалда бўлган фаластинликлар учун бу зарур, шу билан бирга жуда оз миқдордаги ёрдам ҳисобланади. Маълумотларга кўра, Исроил тахминан 3 минг тонналик ёрдам олиб кетаётган 200 дан ортиқ юк машиналарини бир неча кундан бери Ғазога киритмай турибди.

 

Ғазога бу тўқнашув бошланишидан олдин кунига 100 га яқин юк машинасида ёрдам олиб келинган. Бугунги инқироз вақтидаги ушбу 20 та юк машинаси эса денгиздан бир томчи холос.

 

Халқаро ташкилотлар ва экспертлар ҳам ушбу кичик ёрдам карвони Ғазодаги вазиятни ўзгартирмаслигини айтган.