Болгария Украинага ҳарбий техникалар беради
Парламент президент киритган ветони бекор қилди.
Болгария парламенти президент Румен Радев томонидан зирҳли техникаларни Киевга текин топшириш ҳақидаги келишувга қўйилган ветони бекор қилди.
Россияпараст қарашлари билан танилган Радев декабр ойи бошида келишувни бекор қилишга уриниб, ўз ҳаракатини “Болгария фуқароларининг хавфсизлиги, саломатлиги ва ҳаёти ҳукуматнинг устувор йўналиши бўлиши керак” деган сабаб билан оқлади. Аммо Болгария парламентининг 162 аъзоси президент ветосини бекор қилишни ёқлаб овоз берди, 55 депутат эса қарши чиқди.
Киевга кўчма зенит-ракета комплекслари, уларнинг снарядлари ва зирҳли техникалари юборилади. Болгария, шунингдек, украиналик учувчиларни F-16 қирувчи самолётларини бошқаришни ўқитиш дастурида иштирок этади.
