Исроилнинг Ҳиндистондаги элчихонаси яқинида портлаш юз берди
Ҳодиса содир бўлган жой яқинидан Исроил элчиси номига ёзилган хат топилган.
Сешанба куни Исроилнинг Нью-Деҳлидаги элчихонаси яқинида портлаш юз берди. Исроил хавфсизлик хизмати ва Ҳиндистон полицияси биргаликда вазиятни аниқлашга киришди.
Ҳодиса оқибатида қурбонлар ва жароҳатланганлар йўқ.
Ҳиндистон матбуоти хабарига кўра, портлаш содир бўлган жой яқинидан Исроил элчиси номига ёзилган хат топилган. Indian Express нашрининг ёзишича, мактуб компьютерда терилган ва унда ҳақоратли матн бўлган. Бошқа қўшимча маълумотлар келтирилмаган.
Терговчилар портлаш ва хат ўртасида боғлиқлик бор-йўқлигини аниқлашга киришди.
Ўтган декабрь ойида Исроил Миллий Хавфсизлик кенгаши исроилликларни чет элга саёҳат қилиш режаларини қайта кўриб чиқишга, агар сафар жуда зарур бўлмаса, ўзларининг яҳудий ва Исроилга мансублигини ташқи кўринишда ифода этмасликка чақирди. Бу чақириқ бутун дунёда кучаяётган антисемитизмга жавобан қилинган.
