АҚШ ҳарбийлари ўлимига жавобан Ироқ ва Суриядаги нишонларга зарба беради
Об-ҳаво ҳужумлар вақтини белгилаб берувчи асосий омил бўлади.
Америка Қўшма Штатлари Иорданиядаги АҚШ ҳарбий базасига уюштирилган дрон ҳужумига жавобан Ироқ ва Суриядаги Эрон нишонларига зарба бериш режалари бўйича келишиб олди. Бу ҳақда CBS News президент Жо Байден администрацияси расмийларига таяниб хабар берди.
Телеканал манбаларининг қайд этишича, об-ҳаво ҳужумлар вақтини белгилаб берувчи асосий омил бўлади.
Эслатиб ўтамиз, 28 январь куни номаълум дрон АҚШнинг Иорданиядаги Tower 22 ҳарбий базасига зарба берганди, оқибатда уч нафар аскар ҳалок бўлган, 40 дан ортиқ киши жароҳатланган. АҚШ ҳужумда Эронни айблаган, Байден эса Америка ҳужумга жавоб қайтаришига ваъда берган. Теҳрон ҳужумга алоқадорлигини рад этади.
