Чилининг собиқ президенти 74 ёшида аянчли ўлим топди
Мамлакатда миллий мотам эълон қилинди.
Чили собиқ президенти Себастян Пинера вертолёт ҳалокатида вафот этди. Бу ҳақда 6 февраль куни бўлиб ўтган матбуот анжуманида Чили ички ишлар вазирлиги раҳбари Каролина Тоа маълум қилди. Амалдаги президент Габриел Борич миллий мотам эълон қилди ва давлат дафн маросимини ўтказишни буюрди.
Ҳалокат Лаго Ранко коммунаси ҳудудида юз берган: вертолётни ўзи бошқараётган Пинера кучли ёмғир пайтида бошқарувни йўқотган ва борт Ранко кўлига қулаган. Вертолётда собиқ давлат раҳбаридан ташқари яна уч киши бўлган, улар омон қолган ва ўзлари қирғоққа чиқишга муваффақ бўлган. Фавқулодда хизмат ходимлари Себастян Пинеранинг жасадини сувдан олиб чиққан.
Консерватор Себастян Пинера икки марта, 2010-2014 ва 2018-2022 йилларда Чили президенти лавозимида фаолият юритган. У 74 ёшда эди.
