2024 йилда 1 млн гектар майдонга пахта экилади
Мавсум бошида 45,5 минг тонна чигит тозаланган.
Ўзбекистонда 2024 йил ҳосили учун 1 миллион гектар майдонларда ғўза навлари экиш режалаштирилган.
Қайд этилишича, ушбу ғўза навларини экиш учун 50 минг тонна уруғлик чигит талаб этилади. Ғўза навларининг иқлим шароитига мос 22 та эртапишар, 3 та ўртапишар, 4 та ингичка толали ҳамда 24 истиқболли ва янги навларни экиш режалаштирилган.
Шунингдек, республика бўйича мавжуд 46 та уруғлик чигит тайёрлаш сехлари тўлиқ ишлаши учун барча зарурий чоралар кўрилган. Уруғлик чигитларни қадоқлаш учун етарли миқдорда қоп ва ёрлиқлар, кимёвий препаратлар захираси яратилган.
Мавсум бошидан режага нисбатан 45,5 минг тонна ёки 81,3 фоиз уруғлик чигит тозаланиб, сараланган ва бу ишлар давом эттирилмоқда. Қолаверса, мавсум давомида ҳудудий бошқарма ва туман бўлими ходимлари томонидан 188 та назорат тадбирлари олиб борилиб, аниқланган камчиликлар юзасидан огоҳлантиришлар берилиши таъминланган.
