Зилзиладан сўнг бир йилда Малатяда нималар қилинди?

 

Туркияда зилзиладан кейин амалга оширилган ишлар билан танишиш мақсадида Туркманистон, Қирғизистон, Қозоғистон, Ўзбекистон ва Шимолий Кипр Турк Республикасидан келган жами 34 нафар ОАВ вакиллари сафарнинг учинчи куни Малатя вилоятида бўлишди.

 

Малатя губернатори Эрсин Яазачи қардош халқлар матбуот вакиллари билан мулоқотда бўлаётганидан хурсандлигини билдириб, вилоятда табиий офат зарарлари ва уни батараф этиш йўлидаги чора-тадбирлар хусусида сўз юритди.

 

Губернаторнинг таъкидлашича, соғлиқни сақлаш тизимидаги катта шифохоналар зарар кўрмаган. Шу сабабли улар бир маромда ўз фаолиятини давом эттирган.

 

Вилоятдаги 46 та мактаб табиий офатдан зарар кўрган, 2 таси вайрон бўлган. 855 та синфхонага шикаст етган. Айни пайтда 1600 та синфхона таъмирланмоқда, уларнинг 500 таси фойдаланишга тайёр бўлган.

 

Аҳолига ҳам моддий, ҳам маънавий ёрдам бериш ишлари давом эттирилмоқда. Шу даврга қадар зилзиладан азият чеккан фуқароларга 6,1 миллиардлик моддий ёрдам, ҳар ойда 5 минг лирадан “Эсен” пластик карталарига пул тушириб берилмоқда. Шунингдек, зилзила натижасида руҳий жароҳат олганлар билан психологлар, экспертлар ва дин вакиллари шуғулланишмоқда.

 

Губернатор Малаятда ҳаёт давом этаётгани, бир-икки йилда ўз маромига тушиб кетишини, бошқа жойларга кўчиб кетганлар яна қайтишига умид билдирди.