Тошкентда ўқувчи мактабга қурол билан келди
Ҳолат бўйича расмий муносабат билдирилди.
Ижтимоий тармоқ саҳифаларида Тошкент шаҳридаги 142-сонли мактабнинг 8-синф ўқувчиси мактабга қалбаки қурол билан келгани акс этган фотосурати ва хабар тарқалди.
Мактабгача ва мактаб таълими бошқармасига кўра, ҳақиқатан Мирзо Улуғбек туманидаги 142-сонли умумтаълим мактаби 8-«Б» синф ўқувчиси И.A. ўйинчоқ тўппончани белига қистириб, синф доскаси олдида турган ҳолатидаги фотосуратини Инстаграм саҳифасига жойлаган. Кейинчалик бу фотосурат бошқа ижтимоий тармоқ саҳифаларида тарқалиб, кўпчиликнинг муҳокамасига сабаб бўлган.
Мазкур ҳолатдан сўнг мактаб маъмурияти томонидан "Оққўрғон" МФЙ инспектори, ота-оналар иштирокида йиғилиш ўтказилган. Ўқувчининг онаси ҳолат юзасидан Маъмурий жавобгарлик кодексининг 47-моддасига асосан жавобгарликка тортилган. Ўқувчининг ўйинчоқ тўппончаси маҳалла инспектори томонидан олиб қўйилган.
