Эрон Украинадаги урушга «ёмон таъсир кўрсатмоқда»
Буюк Британия мудофаа вазири Грант Шаппс Эрон Россияга баллистик ракеталар етказиб беришини қоралади.
Грант Шаппс Эрон ракеталарининг Россияга етказиб берилиши ҳақидаги разведка маълумотларини ошкор қилмади, бироқ бундай маълумотлар мавжудлигини ва Эрон дунёдаги ҳар қандай можаролардан фаол фойдаланиб, оловга мой сепаётганини таъкидлади. У Эрон Россияга баллистик ракеталар етказиб бериш орқали нафақат Яқин Шарқ минтақасига, балки Европага ҳам «ёмон таъсир кўрсатаётганини» айтди, деб ёзади Sky News.
Аввалроқ, Эрон Россияга Украина шаҳарларига қарши россиялик қўшинлар томонидан фаол қўлланилаётган учувчисиз учоқлардан ташқари бир неча юз километр масофага учадиган юзлаб баллистик ракеталарни етказиб беришга тайёрлиги хабар қилинганди.
Шу ўринда, Эрон Россияга ракета етказиб бераётганини рад этади.
