Россия ўлим жазосини қайтариши мумкин
Давлат Думаси мажлисида парламентидаги икки фракция етакчилари Россияда ўлим жазосига қўйилган мораторийни бекор қилишга чақирди.
"Бугунги кунда бу теракт иштирокчилари учун ўлим жазосидан бошқа жазо бўлиши мумкин эмас", — дея таъкидлади ЛДПР раҳбари Леонид Слуцкий.
"Ўлим жазосини қайта тиклаш учун референдум ўтказиш керак, халқ ўз хоҳиш-иродасини билдирсин. Менинг позициямга келсак, бундай ғайриинсоний ҳаракатларни амалга оширганлар уларни қандай жазо кутаётганини билишлари керак", — дея фикр билдирди "Адолатли Россия" партияси етакчиси Сергей Миронов.
"Конституциямизда ва Жиноят кодексимизда ўлим жазоси бекор қилинмаган. Конституциявий суднинг қарори бор, унда ўлим жазосини ижро этишга фақат мораторий киритилган. Шунинг учун референдум ўтказишнинг ҳожати йўқ, бу масала бўйича Конституциявий суднинг қарори етарли бўлади. Конституциявий суд қарори Европа Кенгаши олдидаги халқаро мажбуриятларни бажариш учун қабул қилинган эди. Биз ҳозирда Европа Кенгаши аъзоси эмасмиз. Шунинг учун бу мавзу муҳокама қилиниши керак", — дея муносабат билдирди Давлат Думаси спикери Вячеслав Володин.
Думанинг Қонунчилик бўйича қўмитаси раҳбари Павел Крашенников Россияда ўлим жазосига иккита — Конституциявий суд ва Президент мораторийлари борлигини эслатди.
"Конституциявий суднинг қарори амалдаги қонунчилик ва халқаро ҳуқуққа асосланган", — дея қўшимча қилди Крашенников.
