Мурманск вилояти губернаторига пичоқ билан ҳужум қилинди
Унинг аҳволи ҳақида батафсил маълумот берилмади.
"Апатити шаҳридаги “Строител” маданият марказида аҳоли билан учрашувдан сўнг номаълум шахс Андрей Чибисга ҳужум қилди. Ҳужум қилган шахс қўлга олинди, губернатор шифохонага ётқизилди", — дея хабар берди Чибиснинг матбуот хизмати.
Унинг аҳволи ҳақида батафсил маълумот берилмади, бироқ ОАВ маълумотларига кўра, у машинага ўзи пиёда бора олган. РБК губернатор матбуот хизматига таяниб, унда жарроҳлик амалиёти ўтказилиши мумкинлигини ёзмоқда.
Тергов қўмитаси хабарига кўра, ҳужум қилган эркак қўлга олинди, у Апатити шаҳрида яшовчи 42 ёшли фуқаро бўлиб чиқди, деб ёзади маҳаллий ОАВ. Ушлаш пайтида у оёғидан яраланган. Эркакнинг мақсади номаълум.
"Сўроқ пайтида эркак ҳужумни гарчи губернаторни яхши танимасада, уни ёқтирмагани учун содир этганини айтди", — дейилади Тергов қўмитаси баёнотида.
