Кадастр агентлигининг 127 нафар ходими пора билан қўлга олинган
Уларнинг 33 нафари қайта ушбу жиноятга қўл урган.
Коррупцияга қарши курашиш агентлигининг ўрганишлари натижасига кўра, Кадастр агентлигидаги коррупциявий жиноятларнинг аксарияти хизмат мавқеидан фойдаланиб фирибгарлик қилиш, мансаб сохтакорлиги ва ҳокимият ёки мансаб ваколатини суиистеъмол қилиш йўналишларида содир этилмоқда.
Кадастр агентлигида фирибгарлик йўли билан пора беришга далолат қилиш ва пора бериш жиноятини содир этган 127 нафар шахснинг 33 нафари муқаддам шу каби жиноятларни содир этгани учун судланган.
“Давлат кадастрлари палатасининг туман (шаҳар) бўлимларида кўчмас мулкка бўлган ҳуқуқларни давлат рўйхатидан ўтказишда коррупциявий жиноятлар 29 фоизни ташкил қилади”, — дейилади Антикоррупция агентлигининг ҳисоботида.
Маълумотларга кўра, ўрганиш натижалари бўйича Иқтисодиёт ва молия вазирлигига тақдимнома юборилгани айтилмоқда.
