Трансфер "остонасидаги" юлдузлар
Ёзда бизни қандай харидлар кутиб турибди?
Европа футболида мавсум якунига етмоқда. Тахминан икки ярим ҳафтадан сўнг биз янги мавсум учун еврокубокларнинг барча иштирокчиларини билиб оламиз. Шундан сўнг бизни трансфер янгиликлари қарши олади. Лекин, футболчилардан қайси бири янги мавсумни бошқа жамоада бошлаши ҳозирдан маълум.
Килиан Мбаппе
Тан олинг: сиз ҳам Мбаппе достонидан чарчадингиз? Футболчи атрофидаги турли янгиликлар кўпчиликнинг ҳафсаласини пир қилгани ҳам бор гап. Тўғри, 2024 йилда бу масалага чек қўйилди. Ва бир неча кун олдин Килианнинг ўзи хайрлашув нутқини эълон қилди. Шундан кейин ҳеч кимда шубҳа қолмади. Ўтган дам олиш кунлари "ПСЖ" Мбаппе иштирокидаги сўнгги уй учрашувини ўтказди. Парижлик мухлислар бу воқеага турлича муносабат билдиришди. Мухлисларнинг бир қисми футболчини ҳаяжонга солган бўлса, иккинчи қисми франциялик футболчи тасвири туширилган улкан баннерни осиб қўйишди. Хабарларга кўра, Килиан ўйин олдидан "ПСЖ" президенти Носир Ал-Хелайфи билан жанжаллашиб қолган. Бир нарса аниқ: Мбаппе янги мавсумни бошқа клубда бошлайди. Бу қайси жамоа эканини ўзингиз яхши биласиз. Килианнинг Париждаги олти йиллик фаолияти якунига етди.
Марко Ройс
Май ойи бошида Дортмунднинг "Боруссия" жамоаси Ройснинг кетишини эълон қилди. Томонлар мавсум охирида тугайдиган шартномани узайтирмасликка қарор қилишди. Футболчи мухлисларга ажойиб қўллаб-қувватлаш учун миннатдорчилик билдирди. "Боруссия"даги 12 йиллик фаолияти давомида Ройс икки марта Германия кубоги ва уч марта мамлакат Суперкубогини қўлга киритди. Ройсда ҳали ҳам жамоадан чиройли тарзда кетиш имконияти бор. У Чемпионлар лигасида ғалаба қозониши мумкин.
Оливе Жиру
Жирунинг мавсум охирида жамоадан кетиши ҳақидаги маълумотлар анчадан буён айланиб юрибди. 7 апрель куни французнинг ўзи ҳали ҳеч нарса ҳал қилинмаганини очиқ айтди. Бир ой ўтгач, форварднинг гаплари бошқача бўлди. Жирунинг сўзларига кўра, у мавсумнинг сўнгги икки ўйинини Миланда ўтказади ва кейин МЛСга ўтади. Жорий мавсум Жиру ҳали ҳам яхши формада эканини кўрсатди. 37 ёшида ҳам у А Cерияда 14 та гол урди. Бу даражадаги форварднинг Европани тарк этиши бироз ачинарли.
Кейлор Навас
"ПСЖ"ни тарк этадиган яна бир футболчи. Навас ижтимоий тармоқларда пост жойлаштириб, пойтахт клуби мухлислари билан хайрлашди. Унинг сўзларига кўра, у Парижда ўзини уйидагидек ҳис қилган. Дарвозабоннинг қарори жуда мантиқий кўринади, чунки жорий мавсумда у атиги бешта ўйинда майдонга тушди. Навас 37 ёшда, лекин у қуйи даражадаги клубда асосий дарвозабон бўлиши мумкин. "ПСЖ" эса Жанлуижи Доннаруммага ишонмоқда. Айнан италиялик футболчи Кейлорни 2021 йилда парижликлар асосий таркибидан чиқариб юборганди. "ПСЖ" бош мураббийи Луис Энрике қизиқарли баёнот билан чиқди. Мураббийнинг сўзларига кўра, Наваснинг кетишига ҳеч қандай сабаб йўқ.
Тиаго Силва
"Мен бу ерга бор-йўғи бир йил ўтказишни режалаштиргандим, лекин охирида тўрт йил қолдим", - деганди бразилиялик футболчи "Челси"ни тарк этишини эълон қилар экан. Дарвоқе, Силва Лондон клубига қайтишни истисно этмади, балки бошқа ролда. У "Челси"га яхши кириб келди - 2020 йилдан бери 150 дан ортиқ ўйин ўтказди, Чемпионлар лигаси, УЭФА Суперкубоги ва клублар ўртасидаги жаҳон чемпионатида ғолиб чиқди. Силва ҳозир 40 ёшда, лекин у ҳали ҳам юқори формага эга. Ҳимоячи фаолиятини Жанубий Американинг энг яхши клуби – "Флуминенсе"да давом эттириши аллақачон маълум қилинган.
Рафаэл Варан
"Манчестер Юнайтед" раҳбарияти Рафаэл Вараннинг 2023/2024 йилги мавсум якунида жамоани тарк этишини эълон қилди. 31 ёшли франциялик футболчининг жамоа билан шартномаси якунланмоқда. 2021 йилнинг ёзида Варан "Реал"дан "Манчестер Юнайтед"га ўтганида, манкунианликлар мухлислари хурсанд бўлишган. Катта турнирларда ғалаба қозониш тажрибасига эга бўлган топ ҳимоячидан умид катта эди. Аммо Манчестерда Варан яхши ўйин кўрсатмади. Варан учун энг мумкин бўлган йўналишлардан бири Саудия Арабистони.
