"Кетиш сабабларини айтишим шарт эмас"
Хави "Барселона" раҳбариятининг қарори ҳақида гапирди.
"Барселона"нинг собиқ бош мураббийи Хави клуб раҳбариятининг уни истеъфога чиқариш ҳақидаги қарорига изоҳ берди, шунингдек, жамоадан кетиш сабабларини айтишдан бош тортди.
"Биз бу мавсум ютуқларни қўлга кирита олмадик, лекин биз тўғри йўлда эдик. Футболда баъзан шундай ҳолатлар бўлиб туради. Қарорларни раҳбарият қабул қилади. Биз жамоада амалга оширган ишимиздан мамнунмиз. Кетиш сабабларини айтишим шарт эмас. Мен буни қабул қилишдан бошқа иложим йўқ. Қарор аллақачон қабул қилинган", - деди Хави.
Жорий мавсумда "Барселона" Испания Ла Лигасида "Реал"дан 10 очко ортда қолиб, иккинчи ўринни эгаллади. Испания кубогида Хави шогирдлари турнир ғолиби Билбаонинг "Атлетик" клубига имкониятни бой берди. Чемпионлар лигасида эса чорак финалда Франциянинг "ПСЖ" жамоасига умумий ҳисобда мағлуб бўлишди. Шунингдек, Испания Суперкубоги финалида "Реал" каталонияликлардан 1:4 ҳисобида устун келишди.
