Ўшда кучли сел тошқинлари кузатилмоқда
Оқибатда бозорларни сув босиб, машиналарни оқизиб кетган.
Қўшни Қирғизистоннинг Ўш вилоятида кучли сел ёғиши оқибатида сув тошқинлари юзага келди.
Кўчкилар натижасида бозорлардаги автомобиллар оқиб кетган. Йўллар ва бозорни сув босган. Қирғизистон Фавқулодда вазиятлар вазирлиги хабарига кўра, воқеа жойига 46 нафар қутқарувчи етиб борган, 420 киши эвакуация қилинган.
Воқеа гувоҳлари ижтимоий тармоқларга жойлаштирган видеоларда марказий бозорда товар ва озиқ-овқат маҳсулотлари қолиб кетгани, бир нечта машина сув остида қолгани ҳамда одамлар хавфсиз жойга бориш учун қияликдан пастга тушишга мажбур бўлганини кўриш мумкин.
Ҳозирда фавқулодда вазиятлар вазирлигининг маҳаллий бўлинмалари ва фуқаро муҳофазаси хизматлари аҳолини эвакуация қилмоқда.
Эслатиб ўтамиз, аввалроқ Ўш вилоятининг Ноокат туманида содир бўлган сув тошқини оқибатида тўққиз киши ҳалок бўлгани хабар қилинганди.
