Париж—2024. Ўзбекистон тенг курашлар остида ўтган ўйинда испанларга мағлуб бўлди
Темур Кападзе шогирдлари 2-турда Мисрга қарши майдонга тушади.
Франциянинг Париж шаҳрида ёзги Олимпиада ўйинлари доирасида футбол мусобақаси старт олди.
С гуруҳининг илк турида Ўзбекистон U-23 терма жамоаси Испанияга қарши баҳс олиб борди. Учрашувнинг 28-дақиқасида испанлар ҳимоячиси Пубилл ҳисобни очди. Бўлим охирида Элдор Шомуродов пенальтини аниқ амалга ошириб, ҳисобни тенглаштирди. Қайд этиб ўтиш лозим ушбу гол Ўзбекистоннинг Олимпиадалар тарихидаги илк голи сифатида тарихдан жой олди.
Иккинчи бўлимда эса испанлар пенальти ишлаб олди. Бироқ Абдувоҳид Неъматов ушбу пенальтини қайтара олди. 62-дақиқада эса айнан пенальтидан унумли фойдалана олмаган Серхио Гомес жамоасининг иккинчи голига муаллифлик қилди.
Учрашув якунига қадар шу ҳисоб сақланиб қолди ва Ўзбекистон 1:2 ҳисобида имкониятни бой берди. Темур Кападзе шогирдлари 2-турда Мисрга қарши майдонга тушади. Учрашув 27 июль куни бўлиб ўтади.
