Шавкат Мирзиёев марҳум академик Беҳзод Йўлдошевнинг оила аъзоларига ҳамдардлик билдирди

 

Шавкат Мирзиёев марҳум академик Беҳзод Йўлдошев хонадонга ташриф буюриб, оила аъзоларига ҳамдардлик билдирди. Ўзбекистон Фанлар академияси президенти, физика-математика фанлари доктори, академик, Олий Мажлис Сенати аъзоси, Ўзбекистон фан арбоби Беҳзод Йўлдошев 28 август куни 79 ёшида вафот этган эди.

 

Президент 29 август куни таъзияли хонадонга ташриф буюрди. Қуръон тиловат қилиниб, дуо ўқилди. Давлат раҳбари марҳумнинг эзгу ишларини, Ўзбекистонга хизматларини ёдга олди. Марҳумнинг рафиқаси ва фарзандларига ҳамдардлик билдириб, сабр-тоқат тилади. Улар ташрифи ва далда сўзлари учун президентга миннатдорлик билдирди.

 

Беҳзод Йўлдошев 1945 йил 9 майда Тошкент шаҳрида туғилган. Меҳнат фаолиятини 1968 йилда Фанлар академиясининг Ядро физикаси институти стажор-тадқиқотчиси сифатида бошлаган. Юқори энергиялар физикаси соҳасида халқаро миқёсда кенг эътироф этилган олим Ядро физикаси институти директори, Фанлар академияси президенти лавозимларида ўзининг юксак илмий ва ташкилотчилик салоҳиятини намоён этган. Юқори малакали илмий кадрлар тайёрлаш, хорижий илмий марказлар билан ҳамкорликни ривожлантириш, илмий натижаларни иқтисодиёт тармоқларида қўллаш ишларига муносиб ҳисса қўшган. У Атом энергияси бўйича халқаро агентликда ва университетларда ишлаган, кўплаб йирик лойиҳаларга раҳбарлик қилган.

 

Беҳзод Йўлдошев Олий Мажлис депутати, кейинги вақтда Олий Мажлис Сенати аъзоси сифатида самарали фаолият олиб бориб, қонун лойиҳаларини ишлаб чиқиш ва қабул қилишда фидойилик кўрсатди.