“Арсенал” дербидаги ғалабани қандай қўлга киритди

 

Дерби олдидан "Арсенал" ярим ҳимояда жиддий муаммоларга дуч келди. Деклан Райс сўнгги турда қизил карточка олди ва дисквалификация қилинди. Мартин Одегаард Норвегия терма жамоаси сафида тўпиғидан жароҳат олди. Натижада, бир қатор мутахассислар томонидан мазкур учрашув дуранг натижа билан якунланиши ҳақида тахминлар билдирилганди.

 

Премьер-лиганинг ўтган мавсумида "Тоттенҳем" ўртача тўпга эгалик қилиш бўйича фақат "Сити"дан кейин иккинчи ўринни эгаллаган бўлса, бу мавсумда Анжелос Постекоглоу жамоаси бу кўрсаткич бўйича пешқадамга айланди.

 

Дербида гарчи, меҳмонлар қарши ҳужумда ўйнаши кутилган бўлсада, аслида бундай бўлиб чиқмади. Биринчи бўлимдаги энг яхши вазиятни "Арсенал" яратди. Троссард тезда тўпни ўзига тўғрилаб олди ва Габриел Мартинеллига узатма берди. Унда эса бўш ҳудуд кўп эди, аммо бразилиялик очиқ турган шеригига тўпни узатиш ўрнига ўзи дарвоза томон зарба берди ва имкониятни йўққа чиқарди.

 

Учрашув сариқ карточкалар билан ҳам эсда қолди. Ушбу дербидан бир кун олдин бир ўйинда футболчиларни огоҳлантириш бўйича Премьер-лига рекорди ўрнатилди - "Челси" ва "Борнмут" футболчиларига 14 та сариқ карточка кўрсатилди. "Тоттенҳем" ва "Арсенал" футболчилари биринчи бўлимда етти марта огоҳлантириш олди. Бунга Журриен Тимбер ва Гуглиелмо Викарио ўртасидаги жанг билан бошланган муштлашув ҳам сабаб бўлди. Бироқ, иккинчи бўлимда фақат Жоргинё огоҳлантириш олди. Янги рекорд эса ўрнатилмади.

 

Бир соат давомида "Тоттенҳем" нафақат фаоллик кўрсатди, балки бир қатор хавфли вазиятларни яратишга ҳам муваффақ бўлди. Бироқ, "Арсенал" барибир ўз мақсадига эришди, жамоага бурчак тўпи ёрдам берди. Букаё Сака томонидан оширилган узатмадан сўнг, Габриел Магалҳаэс боши билан дарвозани ишғол қилди. Дарвозабоннинг бундай зарбани бартараф этиш имконияти йўқ эди. Бу ҳимоячи учун Англия чемпионатидаги 15-гол бўлди.

 

"Тоттенҳем" гол ўтказиб юборганидан кейин ҳам ташаббусга эга бўлишда давом этди, аммо "Арсенал" ўз жарима майдончасида ишончли тарзда ҳимояланди. Ушбу ғалабадан кейин "Арсенал" иккинчи ўринга кўтарилиб олди. "Тоттенҳем" тўрт турдан кейин тўрт очко билан 13-ўринда қолмоқда.