“Барселона” Чемпионлар лигасини мағлубият билан бошлади

 

Ла Лигадаги кетма-кет бешта ғалабадан сўнг, мухлислар олдинги "Барса" яна қайтгани ҳақида гапиришни бошлашганди. Уларнинг айтишларича, "Реал" ва "Атлетико" янги келган футболчилари билан банд бўлиб қолган бир пайтда, Ханси Флик жамоаси бундан унумли фойдаланиб чемпионликни қўлга киритиши мумкин. "Барселона" мавсумни шу қадар омадли бошладики, жамоанинг барча муаммолари бирданига ҳал бўлгандек туюлди. Флик "Барса"га куч ва устунлик туйғусини қайтарганига кўпчилик ишонишди.

 

 

"Барселона"нинг "Манако" билан ўйинини баҳолаш қийин. Тер Штеген иккитадан кўп гол ўтказиб юбориши мумкин эди. Каталонияликлар 10-дақиқадан бошлаб бир киши кам бўлиб ўйнашди. Агар бу ҳолат содир бўлмаганида "Барса"га баҳо бериш осонроқ бўларди. Ҳар ҳолда, "Монако" мавсум бошидан бери "Барселона"ни ҳимояда ўйнашга мажбур қилган биринчи жамоа бўлди. Ва бу биринчи дақиқаларданоқ бошланди. "Барса"нинг марказдаги устунлиги йўққа чиқарилди. Шунингдек, испанларнинг ҳимоя чизиғида бир қатор муаммолар борлиги маълум бўлди. Агар Гарция майдондан четлатилмаганида, "Монако" ўзини бу қадар қулай ҳис қилмаган бўларди. Бироқ, Эрик майдонда бўлганида ҳам, "Барселона"да муаммолар бўлиши мумкин эди.

 

 

Фликнинг жамоаси мафтункор, лекин жуда қўпол. Узоқ муддатли чемпионатда муваффақият қозониш учун жамоани янада мустаҳкамлаш керак. "Барселона" "Монако"дан муҳим сабоқ олди. Унга ҳамма нарса осон бўлмаслиги кўрсатилди. "Монако" билан ўйин Чемпионлар лигасидаги 1-тур баҳси эди, ҳали ортиқча баҳолашнинг ҳожати йўқ. "Барса" албатта ўз очколарини олади ва плей-оффга чиқади. Шундай бўлсада, "Монако"га қарши ўйин "Барселона"ни олдинда бўладиган катта ўйинлар учун тайёргарлик вазифасини ўтаб берди. "Монако" чемпионатдаги бешта ғалабадан сўнг "Барселона"ни тинчлантирди ва янада кучлироқ тайёргарлик олиб бориш кераклигини кўрсатди.