Тошкент аэропортида Ўзбекистонда йўқ қушларни олиб киришга уринган шахс ушланди
Уларнинг умумий қиймати тахминан 60 млн сўмдан ошмоқда.
Тошкент халқаро аэропортида Ўзбекистон фаунасида мавжуд бўлмаган қушларни яширин олиб киришга бўлган уриниш фош қилинди.
Жумладан, Вьетнамнинг Камрань шаҳридан учиб келган йўловчилардан бирининг багажи белгиланган тартибда божхона назоратидан ўтказилганда, йўловчи божхона декларациясида ва божхона ходимларининг оғзаки сўровида маълум қилинмаган, тегишли рухсатномаларга эга бўлмаган 12 бош қушлар борлиги аниқланди.
Мева қутиси орасига яширилган, сақлаш ва ташиш қоидаларига риоя қилинмаган тарзда олиб келинган сариқ ва оқ бўйинли бутақушларнинг ҳозирги ҳолатини мутахассислар салбий баҳолашмоқда. Жумладан қушлардан 3 боши аллақачон нобуд бўлган.
Ҳозирда ҳолат юзасидан текширувлар давом эттирилмоқда.
Дастлабки ҳисоб-китобларга кўра қушларнинг умумий қиймати тахминан 60 млн сўмдан ошмоқда.
