Путин Украинада вақтинчалик ташқи бошқарув жорий этмоқчи

 

Россия президенти Владимир Путин Украинада вақтинчалик халқаро бошқарувни жорий этиш таклифини илгари сурди. Унинг сўзларига кўра, БМТ шафелигида ташкил этиладиган бошқарув сайловлар ўтказиш ва халқ ишончига сазовор бўладиган янги ҳукуматни шакллантиришга ёрдам беради.

 

Путин бу фикрини Мурманск шаҳрига ташрифи чоғида, «Архангелск» атом сувости кемаси экипажи билан учрашувда илгари сурди. Унга кўра, АҚШ, Европа давлатлари ва Россия иштирокидаги вақтинчалик бошқарув тизими Украинадаги сиёсий беқарорлик муаммосига ечим бўлиши мумкин. Агар бундай тизим амалиётга жорий этилса, Москва тинчлик шартномаси бўйича музокаралар олиб боришга тайёр.

 

Путиннинг таъкидлашича, бу фақат муҳокама қилиниши мумкин бўлган вариантлардан бири. У БМТ амалиётида шундай тажрибалар борлигини эслатиб, Шарқий Тимор, Косово ва собиқ Югославиянинг айрим ҳудудлари вақтинча халқаро бошқарув остида бўлганини мисол қилиб келтирди. Шу билан бирга, Россия президенти бошқа ечимларни ҳам муҳокама қилишга тайёрлигини билдирди.

 

Путин Украина ҳокимиятининг қонунийлиги масаласига алоҳида тўхталди. Унинг фикрига кўра, 2024 йилда президентлик сайловлари ўтказилмагани сабабли, амалдаги ҳукуматнинг қонунийлиги шубҳа остида қолмоқда. Унга кўра, Владимир Зеленскийнинг президентлик муддати май ойида якунланган, шунинг учун у ва у томонидан тайинланган барча расмийлар энди қонуний ваколатга эга эмас.

 

Украина ҳукумати эса сайловлар ўтказилмаслигини ҳарбий ҳолат билан изоҳламоқда. Украина Марказий сайлов комиссияси раҳбари Олег Диденко сайловлар фақат уруш тугаганидан кейин ўтказилиши мумкинлигини билдирган. Февраль ойида эса Зеленский тинчлик келишуви ёки НАТОга қўшилиш учун истеъфога чиқиш эҳтимолини ҳам тилга олган эди.

 

Путин фақат дипломатик йўлларни эмас, балки ҳарбий операция давомида эришилаётган натижаларни ҳам таъкидлаб ўтди. Унинг фикрига кўра, Россия армияси фронт чизиғида стратегик ютуқларга эришмоқда. У "Мен яқинда биз уларга ёмғир ёғдирамиз, деб айтгандим, лекин биз уларни тугатамиз деб ўйлаш учун асос бор", дея ўз фикрини якунлади.