Жанубий Корея АҚШдан божхона тарифларида истисно сўрамоқда
Сеул божлар эвазига энергетика ва кемасозлик соҳасида ҳамкорлик таклиф қилди.
Маълум қилинишича, 24 апрель куни Вашингтонда икки давлат ўртасида музокаралар бўлиб ўтган. Учрашувда Жанубий Корея савдо вазири Ан Док Кин Америка томонига энергетика ва кемасозлик соҳасидаги ҳамкорликни таклиф қилган.
Вазир Жанубий Корея энергетика хавфсизлигини мустаҳкамлаш ва Америка билан савдо алоқаларини тиклаш йўлида икки томонлама лойиҳаларни илгари сурган.
Шунингдек, 20 апрель куни Жанубий Корея президенти вазифасини бажарувчи Хан Док Су, АҚШ президенти Доналд Трамп томонидан илгари сурилган ташаббусларни “тарихий қарз” доирасида баҳолаб, қўйилган божлар бўйича қаршилик билдирмаслигини айтган эди.
Аввалроқ, Трамп молия вазири Скотт Бессент ва савдо вазири Ховард Лютник билан учрашганидан сўнг, 75 та мамлакат учун божхона тарифлари вақтинча кечиктирилган эди.
