Ғарб давлатлари Исроилга кескин огоҳлантириш берди
Мавжуд қамал Ғазода очарчиликка сабаб бўлмоқда.
Буюк Британия, Франция ва Канада Исроилнинг Ғазо секторида олиб бораётган ҳарбий ҳаракатлари ва инсонпарварлик ёрдамининг етказилишига қўйилган чекловлар боис жиддий чоралар кўриш билан таҳдид қилди. “Биз доимо Исроилнинг ўз фуқароларини терроризмга қарши ҳимоя қилиш ҳуқуқини қўллаб-қувватлаб келганмиз, бироқ ҳозирги ҳолат номутаносибликка айланиб бормоқда”, дейилади уч давлатнинг қўшма баёнотида.
Ушбу баёнот Исроил армиясининг 16 май куни бошлаган “Гидеон аравалари” номли янги ҳарбий операцияси ва Бош вазир Бинямин Нетаняхунинг Ғазо секторини тўлиқ назоратга олиш режаси ортидан эълон қилинди. Мутахассисларнинг таъкидлашича, бу ҳаракатлар Ғазодаги очарчилик хавфини янада кучайтирмоқда. Ғарб мамлакатлари Исроил ҳукуматининг инсонпарварлик ёрдамини рад этишини халқаро гуманитар ҳуқуқ бузилиши сифатида баҳоламоқда.
Буюк Британия ҳукумати зарур ҳолатларда мақсадли санкцияларни ҳам ўз ичига олган чораларни қўллашга тайёрлигини маълум қилди. Эслатиб ўтамиз, Исроил 2024 йилнинг март ойидан бошлаб Ғазо секторига дори-дармон, озиқ-овқат ва ёқилғи олиб кирилишини чеклаб келмоқда. Бунгача эса Исроил фақат инсонпарварлик ёрдамини ўтказишга рози бўлган, АҚШ, Қатар ва Миср воситачилигидаги тинчлик саъй-ҳаракатларини қўллаб-қувватлашини билдирган эди.
