АҚШ Эрон ядровий объектларига зарба берди
Трамп дипломатик ечим йўқлигига ишонч ҳосил қилгач, ҳарбий чора кўришга қарор қилган.
АҚШ президенти Доналд Трамп Эрон ҳудудидаги учта ядровий иншоотга қирувчи самолётлар томонидан зарба берилганини маълум қилди. Бу ҳақда у “Truth Social” платформасида ёзган.
Трампнинг айтишича, ҳужум Фордо, Натанз ва Исфахон ядровий объектларига қаратилган. “Бомба юки асосий объект бўлган Фордога ташланди. Ҳозир барча самолётлар Эрон ҳаво ҳудудидан ташқарида ва эсон-омон уйларига қайтмоқда”, — деди у.
CNN маълумотига кўра, зарбаларда АҚШ ҳаво кучлари GBU-57A/B бункер-қотил бомбасидан фойдаланган. У деярли 2,5 тонна портловчи модда билан жиҳозланган ва 60 метргача чуқурликдаги нишонларни йўқ қилишга қодир.
Трампнинг умид қилишича, бу зарба Теҳронни музокараларга қайтишга мажбур этади. CNN манбаларига кўра, у дипломатик ечим йўқлигига ишонч ҳосил қилгач, ҳарбий чора кўришга қарор қилган. Ҳозирча янги ҳужумлар режалаштирилмаган.
