АҚШ Европа Иттифоқини интернетдан узиб қўйиши мумкин

 

Доналд Трамп маъмурияти Европа Иттифоқига қарши кескин чораларни кўриши, хусусан, уни интернет алоқасидан маҳрум қилиши мумкин. Бунга сабаб сифатида Европанинг рақамли инфратузилмаси АҚШ компанияларига кучли даражада қарам бўлиб қолганлиги кўрсатилмоқда.

 

Европадаги тартибга солиш масалалари бўйича таҳлил маркази раҳбари Зак Мерс бу борада шундай дейди: “Олдин бундай фикр абсурд туюларди. Аммо бугун Трамп каби лидер интернетни ўчириб қўйишни ёки Европа иқтисодига жиддий зарар етказишни буюриши мумкинлиги реал сценарийга айланган”.

 

Австриянинг “Anexia” хизматлар компанияси раҳбари Александр Виндбичлер ҳам Европа IT соҳаси вакилларини Америкага ҳаддан ташқари технологик қарамликдан огоҳ бўлишга чақирди. Унинг айтишича, Европа рақамли хавфсизлик ва суверенитетдан кўра рақобатбардошликка эътибор қаратгани оқибатида ҳозирда заиф позицияда қолмоқда.

 

Политисо нашри қайд этишича, Европа IT инфратузилмасида АҚШнинг етакчи хизматлари — Amazon Web Services, Microsoft Azure ва Google Cloud — бозорнинг учдан икки қисмидан кўпроғини эгаллаган. Сунъий интеллект соҳасида ҳам Европа АҚШдан анча ортда қолмоқда, микрочиплар ишлаб чиқаришда эса унинг глобал улуши 10 фоиздан кам.

 

Шу сабабли Европа энди рақамли мустақиллик ва технологик хавфсизлик масалаларини жиддий кўриб чиқмоқда. Шу билан бирга, АҚШ билан рақамли ҳамкорликни сақлаб қолиш ҳам асосий стратегик йўналишлардан бири бўлиб қолмоқда.