Францияда Шприцли ҳужумлар содир бўлди
Воқеа миллионлаб одамларни жалб қилган фестиваль вақтида содир бўлган.
Францияда 21 июнь куни бўлиб ўтган анъанавий Fête de la Musique мусиқий фестивали чоғида 145 нафар фуқаро номаълум шахслар томонидан шприцли ҳужумга учради. Бу ҳақда мамлакат Ички ишлар вазирлиги хабар берди.
Ҳозирга қадар 12 киши гумонланиб ҳибсга олинган. Париж полицияси пойтахтда камида 13 та шундай ҳолат қайд этилганини тасдиқлади. Ҳужумлар давомида шприслар орқали наркотик моддалардан фойдаланилган-фойдаланилмагани токсикологик текширувлар орқали аниқланмоқда.
Фестиваль мамлакат бўйлаб миллионлаб одамларни жалб қилган бўлиб, айниқса Париждаги тўпланиш “мисли кўрилмаган” деб баҳоланган. Полиция ва тергов органлари жамоат хавфсизлигини таъминлаш мақсадида суриштирув ишларини давом эттирмоқда.
Сўнгги йилларда Францияда оммавий тадбирлар чоғида шприс билан ҳужумлар кўпайгани кузатилмоқда. Мутахассислар бу ҳолат жамоат соғлиғи ва хавфсизлиги учун жиддий таҳдид эканини таъкидлашмоқда.
