Эроннинг ядровий дастури бутунлай йўқ қилинмади — ОАВ
Дональд Трамп эса ОАВни “ёлғончилар” дея атаб, Эрон ядровий иншоотлари бутундай йўқ бўлиб кетганини айтишдан чарчамаяпти.
АҚШ разведкаси Эроннинг ядровий дастури бутунлай йўқ қилинганини тасдиқламади. Оқ уй бундан ғазабланди
Пентагон разведка бошқармаси АҚШ зарбалари Эроннинг ядровий дастурини бутунлай йўқ қилмаганини, фақат уни бир неча ойга орқага сурганини маълум қилди. Бу ҳақида CNN ва Тhe New York Times манбалари хабар бермоқда.
"Бойитилган уран захиралари олдиндан Фордо, Натанз ва Исфаҳон объектларидан бошқа жойларга кўчирилган бўлиши мумкин, шунингдек, центрифугалар зарар кўрмаган", дея Пентагон ҳисоботидан иқтибос келтиради ОАВ.
CNN асосий зарар ер усти иншоотларига етказилганини таъкидлади. Бундан ташқари, NYT'нинг ёзишича, Эроннинг уранни бойитиш бўйича кичик яширин объектлари ҳам зарар кўрмаган.
Bloomberg агентлиги Исфаҳон объектидаги учта реакторга зарар етмаганини хабар қилди. Агентликнинг МАГАТЭдаги (Халқаро атом энергияси агентлиги) манбаларига кўра, АҚШ бу реакторларга атайлаб ҳужум қилмаган бўлиши мумкин.
Оқ уй ушбу хабарларга кескин муносабат билдирди. Президент Доналд Трамп оммавий ахборот воситаларини "муваффақиятсизлар" ва "ёлғончилар" деб атаб, улар бомба ташлаган учувчилардан узр сўраши кераклигини айтди.
Оқ уй матбуот котиби Кэролайн Ливитт матбуотнинг шубҳаларини "президентни камситиш ва жасур учувчиларни обрўсизлантиришга уриниш" деб атади.
"30 минг фут оғ ирликдаги ўн тўртта бомба аниқлик билан ташланса, бу нишон тўлиқ йўқ қилинишини ҳамма билади", — деди Ливитт.
Доналд Трамп чоршанба куни АҚШнинг Эрон ядровий иншоотларига берган зарбалари "бутунлай йўқ бўлиб кетган" деган даъвосини такрорлади.
Трамп айни дамда Нидерландияда НАТО саммитида бўлиб, у ерда бир неча соатдан кейин матбуот анжумани ўтказиши кутилмоқда.
Теҳрон эса Исроил ва АҚШнинг ядровий иншоотларини нишонга олиши ортидан ядровий қуролларни тарқатмаслик ҳақидаги асосий шартномадан чиқиш билан таҳдид қилмоқда.
