Хитойда пора олган амалдор ўлимга ҳукм қилинди

Хитойнинг Чжухай шаҳар суди 24 июнь куни порахўрликда айбланган Дай Даожинни ўлим жазосига ҳукм қилди. У Хунан провинцияси Халқ сиёсий маслаҳат кенгаши собиқ раис ўринбосари бўлиб, 15 миллион доллардан ортиқ ноқонуний бойлик орттирганликда айбланди. Бу ҳақда China daily хабар бермоқда.

 

Суд ҳукмига кўра, ҳукм ижроси икки йилга кечиктирилган, бу муддатдан сўнг у умрбод қамоқ билан алмаштирилиши мумкин. Шунингдек, Дай Даожин сиёсий ҳуқуқлардан умрбод маҳрум этилди ва мол-мулки мусодара қилинди.

 

У хизмат мавқейидан фойдаланган ҳолда ўзи ёки қариндошлари орқали 107 миллион юандан ортиқ (14,9 миллион доллар) пора олгани аниқланган. Унинг ноқонуний даромадлари давлат хазинасига олиб қўйилади.

 

Хитой раҳбари Си Сзинпин коррупцияга қарши кураш доимий давом этишини таъкидлаб, партияда бундай жиноятларга ҳеч қачон тоқат қилинмаслигини айтган.