АҚШ-Эрон ўртасидаги яширин музокаралар
Трамп 30 миллиард долларлик янги ядро дастурини таклиф қилмоқда.
Вашингтонда Эрон билан ядро музокараларини қайта тиклаш бўйича яширин дипломатик ҳаракатлар давом этмоқда. CNN манбаларига кўра, АҚШ Эроннинг уранни бойитишдан воз кечиши эвазига, унга 20–30 миллиард долларлик фуқаролик ядро энергияси дастурини таклиф қилмоқда. Бу маблағлар тўғридан-тўғри АҚШдан эмас, балки араб иттифоқчилари томонидан берилиши кутилмоқда.
Музокаралар давомида, АҚШ Эроннинг хорижий банклардаги 6 миллиард долларлик музлатилган активларини очиб бериш, айрим санкцияларни бекор қилиш ва янги ядро иншоотлари қурилишини молиялаштиришни ҳам кўриб чиқмоқда. АҚШ махсус элчиси Стив Виткоф бошчилигида Оқ уйда бўлиб ўтган учрашувда ушбу таклифлар муҳокама қилинган.
Трамп маъмурияти Эронга фақат тинчлик мақсадидаги ядро дастурига рухсат беришни хоҳлаяпти, аммо бу дастурда уран бойитиш қатъиян тақиқланган бўлади. Президент Трамп бу борада аниқ келишувга эришиш кераклигини очиқ айтмаган бўлсада, масалага жиддий эътибор қаратилмоқда.
Қатарнинг воситачилигида олиб борилаётган суҳбатлар фонида, АҚШ яқин кунларда Эронга музокаралар бўйича таклифлар ҳужжатини тақдим этиши мумкин. Аммо Эрон ҳукумати расмий тарзда келгуси учрашув ҳақида маълумотга эга эмаслигини билдирди. Шунга қарамай, АҚШ томонидан "тўлиқ ядро қуролсизланиш" шарти асосий тамойил бўлиб қолмоқда.
