Эрон расмийси Трамп ва Нетаньяхуни ўлдиришга чақирди
Эрон расмийси АҚШ ва Исроил раҳбарларига нисбатан қаттиқ таҳдид билдирди.
Эрон олий раҳнамоси Алий Хоманаий идораси матбуот котиби, уламо Алиризо Панаҳийён АҚШ президенти Доналд Трамп ва Исроил Бош вазири Биньямин Нетаньяхунинг баёнотларига нисбатан кескин фикр билдирди. Бу ҳақда “Азад Ирон” Телеграм-каналига таянадиган Oxu.Az нашри хабар бермоқда.
Унинг таъкидлашича, агар бирор шахс Эрон олий раҳбарига таҳдид қилса, у ўлим жазосига ҳукм қилиниши керак. Панаҳийён Доналд Трамп ва Биньямин Нетаньяхуни “олий раҳбарга таҳдид қилган” деб ҳисоблаб, уларни ўлдириш кераклигини айтди.
“Бу фатвога кўра, дунёнинг қайси нуқтасида бўлмасин, ҳар бир мусулмон уларни излаб, жазолаши керак”, — дея қўшимча қилди у.
Мазкур баёнот халқаро ҳамжамиятда кескин норозиликларга сабаб бўлиши мумкин. Расмий халқаро ташкилотлар ва ҳукуматлар бу борадаги муносабатини эълон қилиши кутилмоқда.
