Трамп Ўзбекистонни Ғазо бўйича Тинчлик кенгашига таъсисчи аъзо сифатида таклиф қилди
Президент Шавкат Мирзиёев Ўзбекистоннинг Ғазо бўйича халқаро тинчлик ташаббусида иштирок этишга тайёрлигини билдирди.
Ўзбекистон Президенти Шавкат Мирзиёев номига АҚШ Президенти Доналд Трампдан Яқин Шарқда тинчликни мустаҳкамлаш ва мавжуд можароларни ҳал этишга қаратилган халқаро ташаббусда иштирок этиш бўйича расмий таклиф келиб тушди.
Мактубда қайд этилишича, мазкур ташаббус 2025 йил 29 сентябрь куни эълон қилинган бўлиб, у жаҳоннинг қатор етакчи давлатлари томонидан қўллаб-қувватланган. Ташаббус БМТ Хавфсизлик Кенгашининг 2025 йил 17 ноябрдаги 2803-сонли резолюцияси билан маъқулланган Ғазо секторидаги можарони тугатиш бўйича комплекс режа асосида ишлаб чиқилган.
Ушбу ташаббус доирасида узоқ муддатли тинчлик, барқарорлик ва хавфсизликни таъминлаш учун масъулиятни ўз зиммасига олишга тайёр бўлган давлатларни бирлаштирувчи янги халқаро тузилма — Тинчлик кенгашини ташкил этиш назарда тутилган.
Америка томони Ўзбекистон Республикасига мазкур Тинчлик кенгашига таъсисчи давлат сифатида қўшилиш таклифини билдирган.
Давлатимиз раҳбари Шавкат Мирзиёев америкалик ҳамкасбига йўллаган жавоб мактубида Ўзбекистоннинг Яқин Шарқда тинчлик ва барқарорликни мустаҳкамлашга қаратилган ушбу халқаро ташаббусни қўллаб-қувватлашини ҳамда Тинчлик кенгашига таъсисчи давлат сифатида қўшилишга тайёр эканини маълум қилди.
