Наманганда ҳоким ёрдамчиси ва кадастр ходими пора билан ушланди

 

Поп тумани ҳокимининг маҳалла фуқаролар йиғинларидан бирида фаолият юритувчи ёрдамчиси 1988 йилда туғилган фуқарога деҳқон хўжалиги юритиш учун 49 йил муддатга ажратилган 30 сотих ер майдонини мансабдор танишлари орқали ноқонуний равишда хусусий мулк сифатида расмийлаштириб беришни ваъда қилган. Шунингдек, ушбу ернинг 6 сотих қисмида қурилган уй-жой учун кадастр ҳужжатларини тайёрлаб бериш эвазига 2 минг АҚШ доллари талаб қилган. Бу ҳақда ДХХ Zamon.uzga хабар берди.

 

Давлат хавфсизлик хизмати ҳамда Иқтисодий жиноятларга қарши курашиш департаменти ходимлари томонидан ўтказилган тезкор тадбир давомида ҳоким ёрдамчиси олдиндан келишилган 1000 АҚШ долларини 1990 йилда туғилган таниши орқали олган вақтида ушланган.

 

Мазкур ҳолат юзасидан гумонланувчиларга нисбатан Жиноят кодексининг 168-моддаси 2-қисми «б» банди ҳамда 28, 211-моддаси 1-қисми билан жиноят иши қўзғатилиб, ҳозирда тергов ҳаракатлари олиб борилмоқда.

 

Шунингдек, яна бир ҳолатда Давлат кадастрлари палатасининг Поп тумани филиали ходими давлат захирасидаги 10 сотих ер майдони ва унда қурилган уй-жойни мансабдор танишлари орқали фуқаро номига хусусий мулк сифатида расмийлаштириб бериш эвазига 900 АҚШ доллари ва 4,8 миллион сўм олган вақтида ДХХ, ИИВ ва Иқтисодий жиноятларга қарши курашиш департаменти ходимлари томонидан қўлга олинди.

 

Мазкур шахсга нисбатан Жиноят кодексининг 168-моддаси 3-қисми билан жиноят иши қўзғатилиб, тергов давом этмоқда.