Қозоғистон Тинчлик Кенгашига миллиард долларлик бадалсиз қўшилди

 

Қозоғистон АҚШ президенти Доналд Трамп ташаббуси билан ташкил этилган “Тинчлик Кенгаши”га миллиард долларлик бадал киритмасдан қўшилди. Бу ҳақда Акорда матбуот хизмати Tengrinews.kz нашрига маълум қилди.

 

Қайд этилишича, “Тинчлик Кенгаши”га аъзо бўлиш учун давлатнинг мутлақ суверен қарори талаб этилади. Аъзолик расмийлаштирилган пайтдан бошлаб, мамлакатнинг Кенгашдаги ваколат муддати уч йилни ташкил этади.

 

Акорда матбуот хизмати низомда кўрсатилган 1 миллиард АҚШ доллари миқдоридаги бадал мажбурий эмаслигини алоҳида таъкидлади. Ушбу бадал ихтиёрий бўлиб, уни киритиш ёки киритмаслик ҳар бир аъзо давлатнинг ҳуқуқи ҳисобланади. Агар мазкур бадал биринчи йил давомида амалга оширилса, давлат ўз аъзолик муддатини белгиланган уч йиллик даврдан ташқарига узайтириш имкониятига эга бўлади.

 

“Қозоғистон ЪТинчлик Кенгашиъга ҳеч қандай молиявий ҳисса қўшмасдан қўшилди ва бу низом қоидаларига тўлиқ мос келади”, — дейилади расмий баёнотда.

 

Маълум қилинишича, 22 январь куни Швейцариянинг Давос шаҳрида бўлиб ўтган Жаҳон иқтисодий форуми доирасида Қозоғистон президенти Қосим-Жомарт Тоқаев “Тинчлик Кенгаши” низомини имзолаган. Имзолаш маросимида 18 давлат раҳбарлари ва юқори мартабали вакиллар иштирок этган.

 

“Тинчлик Кенгаши” АҚШ президенти Доналд Трамп ташаббуси билан Ғазо секторидаги можарони бартараф этиш бўйича илгари сурилган комплекс режа доирасида ташкил этилган ҳукуматлараро тузилма ҳисобланади. Кенгаш ташкил этилиши 2026 йил январь ойида расман эълон қилинган.

 

Ҳозирга қадар дунёнинг 60 га яқин етакчи давлатлари “Тинчлик Кенгаши”га қўшилишга таклиф этилган. Доналд Трамп Кенгашнинг биринчи раиси этиб тайинланган.

 

Тузилма таркибига Ижроия қўмита, Ғазо бўйича Ижроия кенгаши ҳамда Фаластин миллий қўмитаси ҳузурида фаолият юритувчи Ғазо секторини бошқариш механизмлари киради.