Хоразмда “Қонун доирасида” ОАВ вакиллари қамоққа олинди
Улар товламачилик ва фирибгарликда гумонланмоқда.
Хоразм вилояти Ички ишлар бошқармаси маълумотига кўра, Урганч шаҳрида “Қонун доирасида” лойиҳаси раҳбарлари ва фаолиятида иштирок этган айрим шахслар қўлга олинган. Ҳибсга олинганлар орасида мазкур лойиҳа менежери бўлиб ишлаган 45 ёшли адвокат Фурқат Рўзметов ҳамда унинг қўл остида фаолият юритган 33 ёшли адвокат Азамат Авезов бор.
Расмий баёнотда қайд этилишича, Урганч шаҳар Ички ишлар бошқармасининг тергов бўлими томонидан бир гуруҳ фуқароларнинг аризалари ва кўрсатмалари асосида терговга қадар текширув ишлари олиб борилмоқда. Мазкур текширувлар доирасида гумонланувчиларга нисбатан Жиноят кодексининг етти моддаси бўйича айбловлар қўзғатилган.
Хусусан, улар туҳмат қилиш, атайлаб ёлғон ахборот тарқатиш, уюшган гуруҳ манфаатларини кўзлаб йирик миқдорда товламачилик қилиш ҳамда мансаб ваколатини суиистеъмол қилиш орқали фирибгарлик содир этишда айбланмоқда.
Шунингдек, ҳуқуқни муҳофаза қилувчи органлар гумонланувчиларнинг сохта ҳужжатлар, жумладан, муҳр ва штампларни тайёрлаш ва улардан фойдаланиш, ўзбошимчалик билан ҳаракатлар содир этиш ҳолатларига алоқадорлигини маълум қилди. Жиноят ишидаги алоҳида эпизодлардан бири атроф-муҳитга зарар етказиш, хусусан, дарахтлар ва экинларни қасддан йўқ қилиш билан боғлиқ экани қайд этилган.
Эслатиб ўтамиз, аввалроқ Taftish.uz нашри ходимлари ҳам товламачилик билан боғлиқ жиноятларда гумонланиб ҳибсга олинган эди.
