Наманганда “Эшон” лақабли кўча безориси қўлга олинди
Илгари ҳам судланган шахс “кўча ишларини ҳал қиламан” деб товламачилик ва безорилик билан шуғулланган.
Наманган шаҳрида фуқароларга босим ўтказиш, товламачилик ва безорилик билан шуғулланиб келган “Эшон” лақабли шахс ҳуқуқни муҳофаза қилувчи органлар томонидан қўлга олинди. Бу ҳақда Наманган вилояти Ички ишлар бошқармаси ахборот хизмати хабар берди.
Маълум қилинишича, қўлга олинган шахс 28 ёшли Баҳриддин Насриддинов бўлиб, у илгари Жиноят кодексининг 277-моддаси биринчи ва иккинчи қисмлари, 168-моддаси тўртинчи қисми ҳамда 228-моддаси учинчи қисми билан судланган.
Шунга қарамай, у жиноят содир этишга мойил шахсларни атрофига тўплаб, улар билан тил бириктирган ҳолда Наманган шаҳрида товламачилик ва безорилик ҳолатларини содир этиб келган. Гумонланувчи фуқаролар ўртасидаги пул олди-берди масалаларини куч ишлатиш орқали “ҳал қилиб бериш”ни ваъда қилиб, ноқонуний даромад орттирган.
Тергов материалларига кўра, Баҳриддин Насриддинов жиноий шериклари билан биргаликда танишини Наманган шаҳридаги “Баркамол авлод” маҳалласи ҳудудига чақирган. Уни “кўча ишларида иштирок этмаслик” ва чақирилган вақтда келмаслик каби баҳоналар билан айблаб, ўткир кесувчи жисм ёрдамида уриб, тан жароҳати етказган.
Вилоят суд-тиббий экспертизаси хулосасига кўра, жабрланувчининг чап елка қисмида кесилган ва санчилган жароҳатлар аниқланган. Аниқланишича, гумонланувчи ўзини “Эшон” лақаби билан танитиб, гўёки “кўча масалаларини ҳал қилувчи шахс” сифатида танилган ва шу йўл билан фуқароларга босим ўтказиб келган.
Мазкур ҳолат юзасидан Баҳриддин Насриддинов процессуал тартибда ушланган. Наманган шаҳар ИИБ ҳузуридаги тергов бўлими томонидан унга нисбатан Жиноят кодексининг 277-моддаси учинчи қисми билан жиноят иши қўзғатилган. Ҳозирда дастлабки тергов ҳаракатлари олиб борилмоқда.
