Европарламент депутати Германияни олтин захираларини АҚШдан олиб чиқишга чақирмоқда

 

Европа Парламенти Хавфсизлик ва мудофаа масалалари бўйича кичик қўмитаси раиси Мари-Агнес Страк-Зиммерманн Германия ҳукуматини АҚШда сақланаётган олтин захираларини имкон қадар тезроқ мамлакатга қайтаришга чақирди. Бу ҳақда у Spiegel нашрига берган интервьюсида маълум қилди.

 

Депутат федерал ҳукуматдан Германияга тегишли олтин захираларини қайтариш бўйича аниқ ва шаффоф жадвал тақдим этишни талаб қилди. Унинг таъкидлашича, бу масала иқтисодий ва хавфсизлик сиёсатида миллий суверенитет билан бевосита боғлиқ.

 

Шунингдек, Страк-Зиммерманн Молия вазирлиги ҳамда Бундесбанкдан олтин захираларини чет элда сақлаш билан боғлиқ хавф-хатарларни очиқ ва батафсил баҳолашни сўради. Унинг сўзларига кўра, АҚШнинг ишончлилигига таяниш Германиянинг иқтисодий ва хавфсизлик сиёсатидаги мустақиллигини тўлиқ таъминлай олмайди.

 

Маълумотларга кўра, Германия 3 350 тонна олтин захираси билан дунёда иккинчи ўринни эгаллайди. Жаҳон олтин кенгаши (WGC)нинг ўтган йил ноябрь ойида эълон қилинган ҳисоботида АҚШ энг йирик олтин захираларига эга давлат сифатида қайд этилган. Россия эса ушбу рейтингда бешинчи ўринда туради.

 

Шу билан бирга, 2026 йил январь ойида Bloomberg сўнгги тўрт йил давомида олтин нархларининг кескин ошиши натижасида Россиянинг олтин захиралари қиймати 216 миллиард долларга кўпайганини маълум қилган.