“Ўзбек–қирғиз” давлат чегарасини бузиб, ноқонуний дори олиб кирган шахс қўлга олинди
Дориларнинг умумий қиймати 1 миллиард 320 миллион сўмни ташкил этади.
Давлат хавфсизлик хизмати Чегара қўшинлари ҳамда Ички ишлар органлари ҳамкорлигида гиёҳвандлик воситалари, психотроп моддалар ва кучли таъсир қилувчи дори воситаларининг ноқонуний айланмасига қарши қаратилган тезкор тадбир ўтказилди. Бу ҳақда ДХХ Zamon.uz'га хабар берди.
Тадбир давомида «ўзбек–қирғиз» давлат чегарасининг Фарғона вилояти Риштон тумани ҳудудидад ўтувчи қисмини бузиб, қўшни давлатдан кириб келган Учкўприк туманида яшовчи, 1983 йилда туғилган шахс қўлга олинди.
Холислар иштирокида ўтказилган текширувда ушбу шахснинг ёнидан умумий қиймати 1 миллиард 320 миллион сўмни ташкил этувчи 9 542 дона «Зардекс» номли кучли таъсир қилувчи дори воситалари аниқланиб, белгиланган тартибда расмийлаштирилиб олинди.
Маълум қилинишича, «Зардекс» дори воситаси таркибида мавжуд бўлган «Прегабалин» моддаси Ўзбекистон Республикаси Вазирлар Маҳкамасининг 2019 йил 27 сентябрдаги 818-сон қарорига мувофиқ, кучли таъсир қилувчи моддалар рўйхатига киритилган бўлиб, унинг эркин муомаласи чекланган.
Ҳозирда мазкур шахсга нисбатан Жиноят кодексининг 223-моддаси 1-қисми, 246-моддаси 1-қисми ҳамда 251¹-моддаси 3-қисми билан жиноят иши қўзғатилиб, унга нисбатан «қамоқ» эҳтиёт чораси қўлланилган.
Ҳозирда тергов ҳаракатлари олиб борилмоқда.
