Жаҳолатга қарши фақат маърифат етарли эмас — Алишер Қодиров
“Миллий тикланиш” партияси раиси интернет безорилиги учун жарима ва қамоқ жазоси жорий этилишини маълум қилди.
Ижтимоий тармоқларда ҳақорат, камситиш ва жамоат осойишталигини бузишга қаратилган ҳаракатлар учун маъмурий жавобгарлик жорий этилиши режалаштирилмоқда. Бу ҳақда “Миллий тикланиш” демократик партияси раиси Алишер Қодиров ўзининг Telegram-каналида маълум қилди.
Унинг таъкидлашича, Маъмурий жавобгарлик тўғрисидаги кодекснинг 183-моддасига киритилаётган 1-қўшимчага мувофиқ, ижтимоий тармоқларда ҳақорат қилиш, камситиш ҳамда жамоат ва фуқаролар осойишталигига путур етказувчи хатти-ҳаракатлар учун 5 миллион сўмгача жарима ёки 10 суткагача маъмурий қамоқ жазоси белгиланиши назарда тутилмоқда.
“Жаҳолатга қарши фақат маърифат билан курашиб бўлмайди, жарима ҳам керак. Лойиҳани қўллаб-қувватладик”, — дея ёзди сиёсатчи.
