Самарқанда 1 килограмм героинни 38 минг АҚШ долларига сотаётган шахс қўлга олинди
Ноқонуний гиёҳвандлик воситалари муомаласи тўхтатилиши натижасида аҳолининг 100 000 дозага тенг бўлган заҳарланишнинг олди олинди.
Аҳоли саломатлиги ва миллат генофондини гиёҳвандлик ва наркожиноятлардан самарали ҳимоя қилиш мақсадида Ички ишлар вазирлиги Тезкор-қидирув департаменти ва унинг ҳудудий бўлинмалари ҳамда Давлат хавфсизлик хизмати ходимлари билан ҳамкорликда интернет тармоғи орқали наркотиклар олди-сотдиси ва уларнинг нарко-каналларини аниқлашга қаратилган тезкор тадбир ўтказилди. Бу ҳақда ИИВ матбуот хизмати хабар берди.
Ўтказилган тезкор-қидирув тадбири натижасида, муқаддам Ўзбекистон Республикаси Жиноят кодексининг 273-моддаси бешинчи қисми билан судланган, 1983 йилда туғилган фуқаро оғирлиги 1 килограмм бўлган героин гиёҳвандлик воситасини 38 000 АҚШ доллари эвазига ўзининг жиноий шериги, 1992 йилда туғилган шахсга сотаётган вақтида ашёвий далиллар билан қўлга олинди.
Ноқонуний гиёҳвандлик воситалари муомаласи тўхтатилиши натижасида аҳолининг 100 000 дозага тенг бўлган заҳарланиши олди олинди. Мазкур ҳолат юзасидан наркосотувчига нисбатан Ўзбекистон Республикаси Жиноят кодексининг 273-моддаси бешинчи қисми билан жиноят иши қўзғатилиб, қамоқ эҳтиёт чораси қўлланилди.
