Тошкент вилоятида уйида яширин «ҳужра» ташкил қилиб, болаларга ноқонуний диний таълим берганлар ушланди
Етарли диний билимга эга бўлмаган ва тегишли рухсатномаси бўлмаган хола ва жиян ҳар бир бола учун ойига 1 миллион сўмдан 300 АҚШ долларигача пул олган.
Тошкент вилояти Ички ишлар бош бошқармаси ва Давлат хавфсизлик хизмати ҳудудий бошқармаси ходимлари ҳамкорлигида ўтказилган тезкор тадбирда Зангиота тумани, Чинор маҳалласида яшовчи 44 ёшли шахс ва унинг 65 ёшли холаси томонидан яширин «ҳужра»лар ташкил этилгани аниқланган. Бу ҳақда Тошкент вилояти ИИББ матбуот хизмати хабар берди.
Аниқланишича, улар етарли диний билимга эга бўлмаган ва тегишли рухсатномаси бўлмаган ҳолда, жами 15 нафар вояга етмаган болага ўз уйларида ноқонуний диний таълим бериб келган. Бир уйда 10, иккинчисида эса 5 нафар бола яшаш ва ўқиш шароитлари билан жойлаштирилган. Ҳар бир бола учун ойига 1 миллион сўмдан 300 АҚШ долларигача пул олганлиги, шунингдек айрим ҳолларда болаларга жисмоний босим қўллангани аниқланган.
Мазкур ҳолат юзасидан болаларни тарбиялаш ва таълим бериш мажбуриятларини бажармаган ота-оналарга нисбатан маъмурий чоралар қўлланилган. Ноқонуний диний таълим билан шуғулланган икки шахсга нисбатан эса Ўзбекистон Республикаси Жиноят кодексининг 229(2)-модда 2-қисми билан жиноят иши қўзғатилган ва тергов ҳаракатлари давом этмоқда.
