Москвада яна Россия генералига суиқасд уюштирилди
Номаълум шахс генералга қарата ўқ узган ва воқеа жойидан қочиб кетган.
Москвада Россия Мудофаа вазирлиги генерал-лейтенанти Владимир Алексеевга нисбатан суиқасд уюштирилгани ҳақида хабарлар тарқалди. Расмий маълумотларга кўра, номаълум шахс генералга қарата ўқ узган деб хабар берди Риа новости.
Россия Тергов қўмитаси маълумотига кўра, ҳодиса 6 февраль куни Москванинг шимоли-ғарбий қисмида содир бўлган. Воқеа жойида номаълум шахс бир эркакка бир неча маротаба ўқ узиб, ҳодиса жойидан яширинган. Жабрланувчи зудлик билан тиббиёт муассасасига етказилган.
Ҳолат юзасидан Россия Жиноят кодексининг қотилликка уриниш ҳамда қурол билан боғлиқ моддаларига асосан жиноий иш қўзғатилган. Ҳозирда тергов ҳаракатлари олиб борилмоқда, видеокузатув ёзувлари ўрганилиб, воқеа гувоҳлари сўроқ қилинмоқда.
Ҳуқуқ-тартибот органлари жиноятга алоқадор шахс ёки шахсларни аниқлаш ва ушлаш бўйича тезкор-қидирув тадбирларини давом эттирмоқда.
Эслатиб ўтамиз, аввалроқ Москвада портловчи мослама ўрнатилган скутер портлаши оқибатида генерал Игор Кириллов ва унинг ёрдамчиси Иля Поликарпов ҳалок бўлган эди. Рус генералини ўлдиришда айбланган ўзбекистонлик эркак умрбодга қамалгани хабар қилинган эди.
