Самарқандда “ҳужра” ташкил қилиб, ноқонуний диний таълим бериб келган эркак ушланди
У моддий манфаат эвазига 7 нафар вояга етмаган ўғил болага диний сабоқ бериб келган.
Давлат хавфсизлик хизмати Самарқанд вилояти бошқармаси ҳамда ички ишлар органлари ҳамкорлигида ўтказилган тезкор тадбир давомида Фарғона вилояти Тошлоқ туманида яшовчи, 1991 йилда туғилган фуқаронинг Ургут тумани “Дўстлик” маҳалласидаги хонадонлардан бирини ижарага олиб, ноқонуний тарзда “ҳужра” ташкил қилгани фош этилди. Бу ҳақда ДХХ Zamon.uz'га хабар берди.
Аниқланишича, махсус диний маълумотга эга бўлмаган ва тегишли рухсатнома олмаган ушбу шахс моддий манфаат эвазига 2011–2016 йилларда туғилган 7 нафар вояга етмаган ўғил болага ноқонуний диний сабоқ бериб келган.
Мазкур ҳолат юзасидан фуқаро Жиноят кодексининг 229²-моддаси 2-қисми (диний таълимотдан сабоқ бериш тартибини бузиш) билан жавобгарликка тортилиб, унга нисбатан қамоқ эҳтиёт чораси қўлланилди. Ҳозирда тергов ҳаракатлари олиб борилмоқда.
