Трамп Тинчлик Кенгашининг биринчи йиғилишида Ғазо учун миллиардлаб долларлик режани тақдим этади
Йиғилишда камида 20 давлат иштирок этиши кутилмоқда, режада ҳудудни тиклаш ва хавфсизлигини таъминлашга қаратилган чоралар муҳокама қилинади.
АҚШ президенти Доналд Трамп келаси ҳафта Тинчлик Кенгашининг биринчи расмий йиғилишида Ғазо секторини қайта тиклаш бўйича кўп миллиард долларлик режани эълон қилади. Бу ҳақда Assosiated Press ахборот манбаларига таяниб хабар берди.
Трамп маъмурияти 19 февраль куни бўлиб ўтадиган йиғилишда камида 20 та давлат иштирок этишини кутмоқда. Режа доирасида урушдан вайрон бўлган Ғазо секторини тиклаш учун миллиардлаб доллар ажратилиши, шунингдек, ҳудуд хавфсизлигини таъминлайдиган халқаро барқарорлик кучлари учун минглаб аскарлар сафарбар этилиши кутилмоқда.
Шу билан бирга, Исроил Бош вазири Бенямин Нетаняхунинг идораси унинг келаси ҳафта Қўшма Штатларга бормаслигини маълум қилган.
Тинчлик Кенгашининг ташкил этилиши Трампнинг Ғазо секторидаги можарони тугатиш бўйича таклиф қилинган режасининг муҳим қисми бўлиб, унинг ташкил этилиши 2026 йил январь ойида эълон қилинган. Дунё бўйлаб 60 га яқин етакчи Кенгашга таклиф қилинди, уларнинг баъзилари асосчи аъзолар сифатида қатнашади. Трамп Тинчлик Кенгашининг биринчи раиси сифатида фаолият бошлайди. 22 январь куни Давосда Кенгашни ташкил этиш маросими ўтказилган.
