Рамазон ойида 2000 дан ортиқ масжиднинг электр таъминоти доимий назоратга олинади
Ҳар бир масжидга алоҳида энергетик мутахассис бириктирилди.
Ўзбекистон Энергетика вазирлиги томонидан муқаддас Рамазон ойи давомида узлуксиз электр энергияси билан таъминлаш мақсадида комплекс чора-тадбирлар режаси ишлаб чиқилиши бўйича йиғилиш бўлиб ўтди.
Махсус йиғилиш якунларига кўра, Ўзбекистон ҳудуди бўйлаб 2000 дан ортиқ масжидларда электр таъминоти барқарорлигини таъминлаш мақсадида тақсимлаш тармоқлари тўлиқ кўрикдан ўтказилиб, аниқланган камчиликлар бартараф этилди. Қарорга мувофиқ, таровеҳ намозлари ўқиладиган ҳар бир масжидга биттадан масъул энергетик мутахассис бириктирилди.
Доимий назоратни таъминлаш мақсадида 24 соатлик мониторинг тизимига жами 2547 нафар муҳандислик-техник ходим жалб этилди. Фавқулодда вазиятларга тезкор жавоб қайтариш учун 210 та махсус бригада шакллантирилиб, улар 250 та махсус техника ва ускуналар билан таъминланди.
Электр узилишлари хавфини камайтириш мақсадида масжидларни электр билан таъминлайдиган тақсимлаш тармоқлари тўлиқ техник аудитдан ўтказилди. Шунингдек, эҳтимолий фавқулодда ҳолатларда узлуксиз таъминотни сақлаб қолиш учун муҳим объектларга дизель генераторлари жойлаштирилмоқда.
Аввалроқ Рамазон ойи муносабати билан эҳтиёжманд оилаларга бир марталик моддий ёрдам ажратилиши режалаштирилгани ҳақида ҳам маълум қилинган эди.
