Ташиевнинг юқори лавозимда ишловчи синфдоши ҳам ишдан олинди
Аввалроқ Миллий хавфсизлик давлат қўмитаси раиси Қамчибек Ташиев ва яна 3 вазир лавозимидан олинган эди.
Қирғизистонда яна кадрлар ўзгариши юз берди. 17 февраль куни Қирғизистон Иқтисодиёт ва савдо вазирлиги ҳузуридаги Монополияга қарши тартибга солиш хизмати раҳбари лавозимига янги тайинлов амалга оширилди.
Вазирлик матбуот хизмати маълум қилишича, аввал мазкур лавозимда фаолият юритган, Қамчибек Ташиевнинг синфдоши бўлган Женали Озораев вазифасидан озод этилган. Унинг ўрнига ушбу тизимда узоқ йиллардан буён фаолият юритиб келган Ойбек Мамиралиев раҳбар этиб тайинланган.
Маълум қилинишича, Мамиралиев 2023 йил 7 сентябрдан буён хизмат раиси ўринбосари лавозимида ишлаб келаётган эди.
Эслатиб ўтамиз, аввалроқ Қамчибек Ташиев ҳам Қирғизистон Миллий хавфсизлик давлат қўмитаси раиси лавозимидан озод этилгани ҳақида хабарлар берилган эди. Шундан сўнг яна бир нечта вазирликларда ҳам кадрлар ўзгариши кузатилган.
