Зеленский Лукашенкога қарши санкциялар жорий қилди
Чекловлар Беларус раҳбарининг Украинага киришини тақиқлаш, активларини музлатиш, савдо ва транзит операцияларини чеклаш, шунингдек, молиявий операцияларни амалга оширишни тақиқлашни ўз ичига олади.
Владимир Зеленский Беларус раҳбари Александр Лукашенкога нисбатан санкциялар жорий этилганини маълум қилди. Мазкур қарор Украина миллий хавфсизлиги ҳамда суверенитетини ҳимоя қилишга қаратилгани таъкидланди. Бу ҳақда ўзининг Телеграм каналида маълум қилган.
“Александр Лукашенко анчадан бери Беларус суверенитетини шахсий ҳокимият эвазига сотмоқда ва русларга санкцияларни четлаб ўтишда ёрдам бермоқда”, деб ёзган Зеленский.
Расмий маълумотларга кўра, санкциялар пакети Беларус раҳбари ва у билан боғлиқ субъектларга нисбатан бир қатор чеклов чораларини ўз ичига олади. Жумладан, Украинага киришни тақиқлаш, активларни музлатиш, савдо ва транзит операцияларини чеклаш, шунингдек, молиявий операцияларни амалга оширишни тақиқлаш назарда тутилган. Айрим санкциялар муддатсиз амал қилиши мумкин.
Украина расмийлари ушбу чораларни Беларуснинг Россия билан ҳарбий-сиёсий ҳамкорлиги, шунингдек, Россияга халқаро санкцияларни четлаб ўтишда ёрдам бераётгани ҳақидаги айбловлар билан изоҳлади.
2025 йил сентябрь ойида Беларус президенти Минск Украина можаросини ҳал қилишда Россияни қўллаб-қувватлашини ва бундан кейин ҳам қўллаб-қувватлашини айтган. Лукашенко "ким ҳақ, ким ноҳақ эканлигини вақт кўрсатади", деб таъкидлаган.
Зеленский баёнотида Беларус ҳудудида Россия ҳарбий инфратузилмаси жойлаштирилгани, жумладан, зарба берувчи дронлар ва ракета тизимлари фаолияти кучайгани алоҳида қайд этилган. Украина томони бундай ҳаракатлар минтақавий хавфсизликка таҳдид туғдиришини таъкидламоқда.
Шунингдек, Украина раҳбари Беларус корхоналари томонидан Россия ҳарбий саноат мажмуасига техника, махсус ускуналар етказиб берилаётгани ҳақидаги маълумотларни ҳам келтирган. Унинг таъкидлашича, бу Украинага қарши ҳарбий ҳаракатлар олиб борилишига билвосита ёрдам сифатида баҳоланмоқда.
